Fransa texnologiya nəhənglərinin vergisini artıracaq
Fransa hökuməti dövriyyəsi 750 milyon avrodan çox olan Google, Amazon, Facebook və Apple kimi transmilli nəhənglərin vergitutmaya cəlb edilməsi haqqında qanun layihəsini hazırlayır. İqtisadiyyat naziri Bruno Le Mer (Bruno Le Maire) bunu “ədalət məsələsi” adlandırıb.
bruno le maire
Fevralın sonuna, ilk növbədə “böyük dördlük” üzvləri Google, Amazon, Facebook və Apple daxil olmaqla transmilli texnologiya şirkətlərinin vergiyə cəlb edilmsi haqqında qanun layihəsi Fransa hökuməti tərəfindən nəzərdən keçiriləcək. Bu barədə Fransanın İqtisadiyyat və maliyyə naziri Bruno Le Mer “Le Journal du Dimanche”-yə müsahibəsində xəbər verib. Bu dörd şirkəti ifadə etmək üçün, onların adlarının birinci hərflərindən ibarət GAFA ixtisarı (abreviaturu) işlənilir.
Onun sözlərinə görə, “vergi rəqəmsal xidmətlər təklif edən, bütün dünya üzrə 750 milyon avrodan artıq dövriyəyə həmçinin Fransa ərazisində 25 milyon avroya malik olan bütün şirkətlərə təsir edəcək”. Nazir beynəlxalq şirkətlərin vergiyə cəlb edilməsini “XXI-ci əsrin problemi” və “ədalət məsələsi” adlandırıb. Hökumət, qanun layihəsini ən qısa müddətdə parlament qarşısına çıxarmağı planlaşdırır. Yeni vergi sayəsində, Fransa büdcəsi hər il əlavə olaraq 500 milyon avro qazanacaq.
Əlavə olaraq, Le Mer vergidən boyunqaçırma hallarına qarşı mübarizə aparacağına və bunun üçün beynəlxalq vergi qaydalarına yenidən baxılması üçün təşəbbüs irəli sürəcəyinə dair söz verib. Onun sözlərinə görə, qanunvericilər “vergidən boyun qaçırmaq məqsədi ilə, olması lazım olmayan yerə yönələn pul axınlarını təqib etməlidirlər”
2017-ci ildə iyun ayının sonunda Avropa Komissiyası inhisarçılığa qarşı proqram çərçivəsində, axtarış sistemləri bazarında hakim mövqeyindən sui-istifadə etdiyi üçün Google şirkətinə 2,4 mlrd avro dəyərində cərimə tətbiq edib.
Komissiya, Google şirkətinin öz axtarış sistemi vasitəsi ilə mal axtarışında Google Shopping xidmətinə üstünlük verərək, Avropa Birliyinin qaydalarını pozması nəticəsinə gəldi. Avropa Komissiyasının məlumatına görə, Google rəqib xidmətlərin reytinqlərini əhəmiyyətli dərəcədə aşağı salaraq, onların təkliflərini ilk axtarış səhifəsində deyil, dördüncü və daha sonrakı səhifələrdə çıxarırdı.
2016-cı ildə Böyük Britaniya Google-u vergi ödəmələri üçün xəzinəyə 130 milyon funt ödəməyə məcbur etdi. Britaniya vergi orqanları hesab etdilər ki, şirkətin İrlandiyada qeydiyyata alınması sayəsində, Google “agressiv” şəkildə vergidən boyun qaçırır. Hökumət korporasiyanı bu vergidən yayınmada günahlandırdı. Səbəblərdən biri kimi, şirkətin 2013-cü il üçün İngiltərədə əldə etdiyi gəlirin 5,6 milyard dolları keçməsinə baxmayaraq, Google, yalnız 20,5 milyon vergi ödəmişdir.
2018-ci ilin noyabr ayında Avropa İttifaqı Şurası “Facebook vergisi” kimi tanınan informasiya xidmətləri sahəsində korporasiyalara tətbiq edilən vergi yaradacağını elan etdi. Büdcə məsələləri üzrə Avropa Komissiyasının sədr müavini Valdis Dombrovskis bu məsələni ən qısa müddətdə həll etməyə çağırıb. Çünki Avropa İttifaqı ölkələri bu cür vergiləri milli səviyyədə tətbiq edə bilərlər. Onun sözlərinə görə, bu, Avropa İttifaqının vahid bazarına mənfi təsir göstərə bilər.
Bundan əvvəl Avropa Komissiyası rəqəmsal texnologiyalar sahəsində fəaliyyət göstərən transmilli şirkətlər də daxil olmaqla Avropa Birliyində fəaliyyət göstərən şirkətlərin gəlirlərindən 3% səviyyəsində toplanmalı olan rəqəmsal vergi layihəsini hazırlamışdır. Onların illik dövriyyəsi 750 milyon avrodan çox olmalıdır.
