Milyonçular ən çox hansı şəhərdə yaşayırlar?
Nyu – York ən çox milyonçunun yaşadığı şəhər statusunu itirib. Bu nailiyyəti Cənub – Şərqi Asiyada qərarlaşan, Çinin xüsusi administrativ ərazisi olan Honq – Konq şəhəri əldə edib.
Honq-Konq şəhərinin görüntüsü
Honq – Konqun uğuru.
“Wealth-X” araşdırmalar mərkəzinin dərc etdiyi son hesabata görə 2017-ci il ərzində Asiyanın əsas iqtisadi mərkəzi olan Honq – Konqda gəlirləri 30 milyon dollar və ya ondan çox olan sakinlərin sayı, 3 dəfə artaraq 10.000 nəfərə çatıb. Hesabatda qeyd edilir ki, Honq – Konq sakinləri arasında zəngin insanların sayının kəskin artmasına təsir edən əsas səbəb, şəhərin fond birjasının sürətli inkişafı, genişlənən maliyyə əlaqələri və Çinin nəhəng daxili bazarıdır.
Mərkəz öz hesabatında Honq – Konqun ən varlı sakinləri arasında Li Ka Şinqi xüsusi qeyd edir. “Cheung Kong” (CKHUY) imperiyasına rəhbərlik edən Li Ka Şinq bütün dünya üzrə bir sıra liman, telekommunikasiya şəbəkələri və enerji şirkətlərini idarə edir.
Hesabatda o da qeyd edilib ki, Çinin digər nəhəng şəhərləri bu göstərici üzrə heç bir nailiyyət əldə edə bilməyiblər, lakin ölkə bütün ərazisi boyunca geniş iqtisadi inkişaf plastları yaratmağa davam etdirəcək.
Ölkələr üzrə milyonçu sayına görə ABŞ hələki liderdir.
“Wealth-X” qeyd edir ki, Nyu – Yorkun birinciliyi itirməsinə baxmayaraq ən çox varlı insanların əksəriyyəti hələ də ABŞ-da yaşayırlar. Demək olar ki, dünyanın ən varlı insanlarının üçdə biri ABŞ sakinləridirlər. Ancaq Çin bu rəqabətdə ABŞ-a çatır. Ötən il ərzində Asiyada yaşayan varlı vətəndaşların sayı 20% artıb. Analitiklərin fikrinə görə Asiya dövlətlərinin infrastruktur və iqtisadi islahatlara maliyyə yatırımlarını artırmaları bu göstəricilərin artmasına müsbət təsir göstərir. Gözləntilərə görə Asiya – Sakit okeanı regionu növbəti 5 il ərzində yüksək gəlirli vətəndaşlar göstəricisinə görə ABŞ-a çatacaq.
Qlobal miqyasda olduqca zəngin olan insanların sayı ötən il ərzində 13% artaraq, təqribən 250.000 nəfər çatıb. Onların sərvətlərinin ümumi kapitallaşması isə 31,5 trilyon dollar təşkil edir. Bu nailiyyət də öz növbəsində qlobal iqtisadiyyat və fond birjalarının inkişafına öz töhfəsini verir.
Lakin irəliləyən illərdə Çinin iqtisadi vəziyyəti bir qədər də ağırlaşa bilər. Buna səbəb isə rəsmi Pekinin ABŞ-la iqtisadi qarşıdurmaya getməsi və mövcud vəziyyətin əks təsirləridir. Çinin hal – hazırda öz maliyyə sistemi üzrə nəhəng borcları var, ölkənin milli valyutası isə dollara nisbətdə zəifləməyə davam edir.
Reytinqdə Tokio, Los – Anceles, London və Paris kimi nəhəng şəhərlər də yer alıblar.
Xatırladırıq ki, “Wealth-X” sıralamanı dərc etdiyi tarixdən bəri (2011-ci il) Nyu – York bu göstərici üzrə hər dəfə birincilik əldə edib.
